នេះជាលើកទីបីហើយ ដែលខ្ញុំបានចូលរួម BITS10 រាប់តាំងពីឆ្នាំ 2018 មក។
កាលពីសប្ដាហ៍កន្លងទៅនេះ (2-4 វិច្ឆិកា 2023) សន្និសីទ BITS បានធ្វើឡើងជាថ្មីម្ដងទៀត ក្រោយអាក់ខានអស់រយៈពេលពេលជាងបីឆ្នាំ ដោយសារតែបញ្ហាជំងឺកូវីត។
BITS ពីដើមមានឈ្មោះពេញថា Bangkok International Typography Symposium បានផ្លាស់ប្ដូរឈ្មោះមកជា Brand Identity and Typography Symposium ឬហៅថា BITS10 នៅឆ្នាំ 2023 នេះ។
ការផ្លាស់ប្ដូរឈ្មោះ កើតឡើងដោយសារតែរយៈពេលជាងដប់ឆ្នាំនៃការរៀបចំសន្និសីទនេះ ក្រុមការងារ BITS មើលឃើញអំពីទំនាក់ទំនងយ៉ាងជិតស្និទ្ធិរវាង អត្តសញ្ញាណប្រ៊ែនត៍ (Brand Identity) និង ការប្រើប្រាស់អក្សរ (Typography) ដែលកើតមានក្នុងវិស័យឌីហ្សាញក្រាហ្វិកទាំងក្នុងតំបន់អាស៊ីអាគ្នេយ៍ និងអន្តរជាតិ។
![](https://sovichet.com/wp-content/uploads/2023/11/bits10-2023-cover-1-1024x433.png)
សន្និសីទដ៏សំខាន់មួយក្នុងតំបន់
BITS ជាសន្និសីទឌីហ្សាញដ៏សំខាន់និងធំមួយនៅក្នុងតំបន់អាស៊ីអាគ្នេយ៍យើង ជាទីកន្លែងជួបជុំអ្នកជំនាញនិងអ្នកចាប់អារម្មណ៍ក្នុងវិស័យទាំងពីរនេះ ដោយមានអ្នកចូលរួមមកពីគ្រប់ទិសទីនៃពិភពលោក។
រៀបចំដោយក្រុមហ៊ុន Cadson Demak និងមានលោក Anuthin Wongsunkakon ជាអ្នកផ្ដួចផ្ដើមពីឆ្នាំ 2010 មក, ព្រឹត្តិការណ៍ BITS ទទួលបានការគាំទ្រ និងការចូលរួមពីដៃគូសហការជាច្រើននាពេលកន្លងមក ទាំងក្នុងតំបន់និងក្រៅតំបន់ដូចជា CommDE, CommMA, Type Network, Monotype, Morisawa, Google Fonts ។ល។
ហើយឆ្នាំនេះ យើងបាននាំក្រុមការងារ Anagata Design ទៅចូលរួមដែរ។
![](https://sovichet.com/wp-content/uploads/2023/11/IMG_3886-scaled.jpg)
ការជួបជុំមិត្តភក្ដិ
ក្រោយជាងបីឆ្នាំនៃជំងឺកូវីត ខ្ញុំរីករាយបានជួបមិត្តភក្ដិរួមជំនាញ ទាំងចាស់ទាំងថ្មី ដែលនៅជ្រុងម្ខាងទៀតនៃពិភពលោក។ យើងបានជជែកគ្នាអំពីបញ្ហា ដំណោះស្រាយ បទពិសោធន៍ និងគំនិតថ្មីៗ នៅក្នុងការងារនិងការស្រាវជ្រាវផ្សេងៗ។
ពេលខ្លះ ការជួបជុំគ្នាបែបនេះ វាមានសារសំខាន់ណាស់ ដើម្បីជំរុញភាពច្នៃប្រឌិតនិងលើកទឹកចិត្តគ្នា ឱ្យបន្តទៅមុខទៀតក្នុងជំនាញរៀងៗខ្លួន។ អ៊ីចឹង ម្ដងម្កាល ប្រសិនបើអ្នកមានឱកាសទៅចូលរួមសន្និសីទឬកម្មវិធីណាមួយក្នុងជំនាញរបស់អ្នក អ្នកគួរតែចូលរួម ដើម្បីបើកចិត្តគំនិតឱ្យកាន់តែធំទូលាយជាងមុន។
![](https://sovichet.com/wp-content/uploads/2023/11/2C8BABC8-9CB4-46E0-AFE6-02C182A63BAB_0.jpg)
![](https://sovichet.com/wp-content/uploads/2023/11/4176E3CD-2CDC-4F1B-87BA-E91E62A5939C_0.jpg)
![](https://sovichet.com/wp-content/uploads/2023/11/IMG_3894-1024x768.jpg)
![](https://sovichet.com/wp-content/uploads/2023/11/368014990_1244439942894724_7704623855359304465_n.jpg)
![](https://sovichet.com/wp-content/uploads/2023/11/998DE31D-4863-497C-996C-341BAB4403A4_0.jpg)
បទបង្ហាញរបស់ខ្ញុំ
ឆ្នាំនេះលើសពីឆ្នាំមុនៗ គឺខ្ញុំបានឡើងធ្វើបទបង្ហាញជាមួយក្រុមការងារ និងមិត្តភក្ដិរួមគម្រោង ទៅលើប្រធានបទចំនួនពីរ។
Learning Curve: Reconnecting Typography and Brand Identity Design in Cambodia
នេះជាបទបង្ហាញទីមួយក្នុងថ្ងៃទីមួយ (Discussion Day) ដែលខ្ញុំនិងបុត្រ ជជែកគ្នាអំពីបទពិសោធន៍ការងារជាងបួនឆ្នាំនៅ Anagata Design។
ការជជែកនេះ ពួកយើងបង្ហាញឧទាហរណ៍និងមេរៀនពីអតីតកាល នូវការយកចិត្តទុកដាក់របស់អ្នកឌីហ្សាញក្រាហ្វិក និងអ្នកគូរអក្សរ (សិល្បៈអក្សរ) ដែលបានឆ្លុះបញ្ចាំងអំពីអត្តសញ្ញាណរបស់ក្រាហ្វិកឌីហ្សាញខ្មែរ។
តាមរយៈការសង្កេតនិងធ្វើការក្នុងវិស័យនេះក្នុងពេលបច្ចុប្បន្ន យើងឃើញនូវបញ្ហានៃ ការប្រើប្រាស់មិនស្របគ្នារវាង ការឌីហ្សាញអត្តសញ្ញាញក្រុមហ៊ុន និង ការប្រើប្រាស់អក្សរ ហើយយើងសាកល្បងផ្សារភ្ជាប់វិស័យទាំងពីរនេះឡើងវិញ តាមរយៈគម្រោងដែលយើងបានធ្វើទៅឱ្យអតិថិជន។
![](https://sovichet.com/wp-content/uploads/2023/11/image-4-1024x1024.png)
![](https://sovichet.com/wp-content/uploads/2023/11/image-5-1024x1024.png)
![](https://sovichet.com/wp-content/uploads/2023/11/F0831030-9215-486C-A07C-F70C9EB9B071_0.jpg)
![](https://sovichet.com/wp-content/uploads/2023/11/IMG_20231102_133049-scaled.jpg)
![](https://sovichet.com/wp-content/uploads/2023/11/CB6AA07B-F888-4675-8ED9-10BC2BBD35AF_0.jpg)
Grab Community: Custom Typeface as a Brand Building Tool
នៅ Anagata Design ក្រៅពីការងាររចនាអត្តសញ្ញាណប្រ៊ែនត៍ ពួកយើងមានសេវាកម្មរចនាពុម្ពអក្សរថ្មី សម្រាប់អតិថិជនដែលជាសហគ្រាសជាតិនិងអន្តរជាតិ។
ក្នុងនោះដែរ ពួកយើងបានរួមសហការជាមួយ Sueh Li (huruf type) នៅម៉ាឡេស៊ី ដើម្បីបំពេញគម្រោងពុម្ពអក្សរថ្មីទៅឱ្យអតិថិជនយើងគឺ Grab។ ខ្ញុំបានរួមចំណែកផ្នែកពុម្ពអក្សរខ្មែរ។
នៅថ្ងៃនោះ យើងក៏មាននាយិកាផ្នែកច្នៃប្រឌិតប្រចាំក្រុមហ៊ុន Grab គឺ Carina Teo ចូលរួមជាមួយពួកយើង ដើម្បីបង្ហាញទៅកាន់អ្នកចូលរួម នូវការវិវឌ្ឍអត្តសញ្ញាណរបស់ Grab និងការសម្រេចចិត្តរបស់ក្រុមហ៊ុនចំពោះការរចនាពុម្ពអក្សរថ្មី សម្រាប់ភាសានៅតំបន់អាស៊ីអាគ្នេយ៍។
![](https://sovichet.com/wp-content/uploads/2023/11/image-1-1024x1024.png)
![](https://sovichet.com/wp-content/uploads/2023/11/image-1024x1024.png)
![](https://sovichet.com/wp-content/uploads/2023/11/379DAC86-4ECD-475D-BCC3-9C030492E87F_0.jpg)
ប្រធានបទគួរឱ្យចាប់អារម្មណ៍ផ្សេងទៀត
បទបង្ហាញឆ្នាំនេះ លើកឡើងពីបញ្ហានិងប្រធានបទផ្សេងៗគ្នា ដែលសុទ្ធតែគួរឱ្យចាប់អារម្មណ៍។ ខ្ញុំមានប្រធានបទមួយចំនួន ដែលចង់និយាយបន្តិចៗនៅក្នុងសំណេរនេះ។
1. Lessons Learned – Roger Black
លោក Roger Black បានធ្វើការក្នុងវិស័យឌីហ្សាញអស់រយៈពេលជាង 50 ឆ្នាំមកហើយ។ នៅក្នុងបទបង្ហាញនេះ លោកលើកឡើងអំពីមេរៀនទាំងឡាយដែលលោកគិតថាមានសារសំខាន់ចំពោះមនុស្សជំនាន់ក្រោយ ជាពិសេសអ្នកធ្វើការក្នុងវិស័យបោះពុម្ពសៀវភៅ ទស្សនាវដ្ដី និងក្រាហ្វិក។ ខ្លឹមសារនៅក្នុងបទបង្ហាញនេះ ជាផ្នែកមួយនៃសៀវភៅដែលលោកនឹងបោះពុម្ពផ្សាយអនាគត។
![](https://sovichet.com/wp-content/uploads/2023/11/PXL_20231103_045138650-scaled.jpg)
![](https://sovichet.com/wp-content/uploads/2023/11/PXL_20231103_051302356-scaled.jpg)
2. Typewriters Redux – Santi Tonsukha
លោក Santi បានធំធាត់ឡើងជាមួយម៉ាស៊ីនអង្គុលីលេខនៅប្រទេសថៃ ហើយក្រោយមកលោកចាប់ផ្ដើមប្រមែប្រមូលម៉ាស៊ីនទាំងនោះមកសិក្សាស្វែងយល់អំពីភាពខុសគ្នារបស់ពួកវា និងការប្រើប្រាស់នៅក្នុងសង្គមថៃពីអតីតកាល។
ដោយសារសព្វថ្ងៃនេះ ខ្ញុំមានប្រធានបទស្រដៀងគ្នាដែលត្រូវសិក្សាស្រាវជ្រាវដែរ ខ្ញុំបានជជែកសួរនាំលោក Santi បន្ថែមលើកិច្ចការងារនេះ ហើយសង្ឃឹមថាខ្ញុំនឹងអាចសរសេររៀបរាប់អំពីការសិក្សាមួយនេះនៅថ្ងៃអនាគតដែរ។
![](https://sovichet.com/wp-content/uploads/2023/11/PXL_20231103_065918488-scaled.jpg)
![](https://sovichet.com/wp-content/uploads/2023/11/PXL_20231103_070207303-scaled.jpg)
3. How SandollCloud changed the Korean design industry and market? – Chorong Kim
បើក្រឡេកមើលប្រទេសដទៃនៅជុំវិញតំបន់អាស៊ី ពួកយើងជួបប្រទះបញ្ហាប្រហាក់ប្រហែលគ្នា ដូចជាការលួចចម្លងនិងចែកចាយពុម្ពអក្សរ កង្វះខាតដំណោះស្រាយ និងភាពស្មុគស្មាញក្នុងការទិញពុម្ពអក្សរមកប្រើប្រាស់ឱ្យស្របច្បាប់។
ដោយឃើញបញ្ហានៅក្នុងទីផ្សារប្រទេសកូរ៉េ, ក្រុមហ៊ុន Sandoll បានបង្កើតផ្លាតហ្វមមួយកាលពីឆ្នាំ 2014 គឺ SandollCloud ដើម្បីផ្ដល់និងចែកចាយពុម្ពអក្សរមកពីជុំវិញពិភពលោក តម្រូវនឹងទីផ្សាររបស់ប្រទេសកូរ៉េ ដោយផ្ដល់ភាពងាយស្រួលក្នុងការទិញពុម្ពអក្សរយកទៅប្រើប្រាស់។
![](https://sovichet.com/wp-content/uploads/2023/11/PXL_20231104_070603201-scaled.jpg)
![](https://sovichet.com/wp-content/uploads/2023/11/PXL_20231104_071216810-scaled.jpg)
4. Will that work? Let’s try out with the students – Hsin Yin Low, Vinod J. Nair
ការបង្រៀនផ្នែកមុទ្ទវិជ្ជា (typography) មិនមែនមានវិធីសាស្ត្រតែម្យ៉ាងទេ គឺគេអាចយកវត្ថុនិងគំនិតផ្សេងៗ មកបង្កើតជាមេរៀនបានច្រើនយ៉ាង។
នៅក្នុងនេះ Hsin Yin និង Vinod បានប្រើវិធីសាស្ត្រម្យ៉ាង ដោយឱ្យសិស្សយករូបភាពណាមួយ មកកាត់ចេញជាអក្សរ ហើយស្វែងយល់អំពីចរិតលក្ខណៈនៃរូបរាងទាំងនោះ ហើយបង្កើតជាតួអក្សរផ្សេងៗទៀត។
ខ្ញុំចាប់អារម្មណ៍ប្រធានទនេះណាស់ ព្រោះខ្លឹមសារពីបទបង្ហាញនេះ ផ្ដល់គំនិតថ្មីៗសម្រាប់ខ្ញុំនិងអ្នកចូលរួម យកទៅអនុវត្តក្នុងការបង្រៀនផ្នែកអក្សរនៅថ្ងៃក្រោយបាន។ នៅកម្ពុជា ហាក់មិនទាន់មានវគ្គសិក្សាណាមួយ សង្កត់ធ្ងន់លើការប្រើប្រាស់និងរចនាតួអក្សរឡើយ។
![](https://sovichet.com/wp-content/uploads/2023/11/PXL_20231104_090928701-scaled.jpg)
![](https://sovichet.com/wp-content/uploads/2023/11/PXL_20231104_091610204-scaled.jpg)
![](https://sovichet.com/wp-content/uploads/2023/11/PXL_20231104_091812111-scaled.jpg)
![](https://sovichet.com/wp-content/uploads/2023/11/PXL_20231104_092525848-scaled.jpg)
កម្មវិធីល្អ ម្ហូបឆ្ងាញ់
ត្រូវហើយ ប្រធានបទល្អៗមានច្រើន ហើយជួបអ្នកពូកែៗក៏ច្រើន តែយើងមិនអាចបំភ្លេចម្ហូបឆ្ងាញ់ៗទេ! 😄
![](https://sovichet.com/wp-content/uploads/2023/11/PXL_20231102_121653896-1024x769.jpg)
![](https://sovichet.com/wp-content/uploads/2023/11/BC08ADA8-A783-4850-A601-859306B74DF5_0-576x1024.jpg)
![](https://sovichet.com/wp-content/uploads/2023/11/397991277_3149685592006929_5069191534995302300_n-768x1024.jpg)
ជួបគ្នាឆ្នាំក្រោយ…
![](https://sovichet.com/wp-content/uploads/2023/11/013DF0E2-24F3-4368-A33A-70953A6B70D3_0.jpg)
មិនមែនមានតែខ្ញុំម្នាក់ទេ គឺអ្នកចូលរួមសឹងតែគ្រប់គ្នា សរសើរនិងពេញចិត្ត BITS នៅឆ្នាំនេះ។ កត្តាមួយដ៏សំខាន់ដែលខ្ញុំបានឃើញនៅឆ្នាំនេះ គឺភាពចម្រុះរបស់ប្រធានបទនិងអ្នកចូលរួម និងឱកាសបង្ហាញវត្តមានសម្រាប់វាគ្មិននៅក្នុងតំបន់អាស៊ី ទៅកាន់អ្នកចូលរួមមកពីតំបន់ផ្សេងៗទៀត។
អរគុណ BITS និង Cadson Demak ដែលបានរៀបចំសន្និសីទមួយនេះ ហើយខ្ញុំសង្ឃឹមថាយើងនឹងជួបគ្នាម្ដងទៀតនៅឆ្នាំក្រោយ!
Leave a Reply