ឆ្នាំនេះ ខ្ញុំអាន សរសេរ និយាយ ច្រើនជាងមុន

បិទ​ភ្នែក បើក​ភ្នែក មួយឆ្នាំទៀត​ទៅហើយ!

ការ​ឆ្លុះបញ្ចាំង​ខ្លួនឯង (ដោយមិនប្រើ x-ray) មិនមែន​ជាទម្លាប់​ខ្ញុំ​ប៉ុន្មាន​ទេ ប៉ុន្តែ​ឆ្នាំនេះ​ហាក់​ខុសប្លែក​ពី​ឆ្នាំ​រាល់ដង​ដែល​ធ្លាប់​តែអ្វីៗ​មាន​សភាព​ស្មើៗ មិនរំជើបរំជួល​ខ្លាំង។ ខណៈ​ឆ្នាំ​នេះ ឡើងចុះៗ ស្រដៀង​នឹង​អាកាសធាតុ​ស្រុកខ្មែរ​ដែរ។

ខ្ញុំ​ជឿថា គ្រប់គ្នា​សុទ្ធតែ​រងឥទ្ធិពល​ពី​កូវីត បញ្ហា​ហិរញ្ញវត្ថុ បញ្ហាសេដ្ឋកិច្ច ដែល​រហូត​ដល់​ប៉ះពាល់​ផ្លូវចិត្ត។ ធ្វើ​ឱ្យ​អ្នក​ខ្លះរួមទាំងខ្ញុំ ស្វែងរក​ព្រះធម៌ ស្ដាប់ ប្រតិបត្តិ​ដោយ​អន្លើ ឱ្យ​ការគិត​ល្អ​ជាងមុន។ តែ​ក៏នៅមាន​អ្នក​ខ្វះ​សេចក្ដី​សុខ​ផ្លូវចិត្ត នាំ​ឱ្យ​គេ​ស្វែងរក​វិធីសាស្ត្រ​និង​ជំនឿ​ផ្សេងៗ ដោយសង្ឃឹម​រឿង​វិជ្ជមាន​នៅ​អនាគត​ដែល​មើល​មិន​ឃើញ។

ឆ្នាំ​នេះ ក៏​ឃើញ​ប្រជាជន​ខ្មែរ​រួមទាំង​ខ្ញុំ​ដែរ (សុំ​ភ្ជាប់ខ្លួន​ខ្ញុំច្រើនបន្តិច) ស្វះស្វែង​រក្សា​សុខភាព​ផ្លូវកាយដែរ តាមការ​ហាត់ប្រាណ តាមការ​ហូប​ចុក​ឱ្យមាន​ប្រមាណ។ មែនទែន​ទៅ ការ​ហាត់ប្រាណ​នេះ ប្រាកដណាស់​ថា​នឹង​ជួយ​យើង​ឱ្យ​រស់​បាន​យូរ តែ​គ្រាន់តែ​យូរ​ក្នុង​ក្របខណ្ឌ​សុខភាព​ប៉ុណ្ណោះ យើង​នៅ​តែ​មើល​ថ្ងៃ​អនាគត​មិន​ឃើញដូចតែគ្នាហ្នឹង។

ខ្ញុំ​ពីដំបូង​មិន​ចង់​សរសេរ​ការ​ឆ្លុះបញ្ចាំង​នេះ​ប៉ុន្មានទេ ប៉ុន្តែបំណាច់​បាន​ចាប់ផ្ដើម​វ៉ិបសៃត៍​រួច​ទៅហើយ ត្រូវ​តែ​សរសេរ​ទុក​ឆ្លុះ​ខ្លួនឯង​នៅឆ្នាំ​ក្រោយ ហើយ​ក៏​ដើម្បី​ចែករំលែក​រឿងខ្លះៗ​ជូន​មិត្តអ្នកអាន។

ខ្ញុំអាន

ខ្ញុំ​មាន​ទម្លាប់អាន​តែរហូតទេ ប៉ុន្តែឆ្នាំ​នេះ​ខ្ញុំ​អាន​បាន​ច្រើន​ជាងមុន ហើយ​ចេះ​អាន​សៀវភៅរឿង​ ឱ្យ​មាន​ការ​កម្សាន្ត​ខ្លះ។ ពីមុនៗ ខ្ញុំ​អាន​តែ​សៀវភៅ​ទស្សនវិជ្ជា ចិត្តវិទ្យា វិទ្យាសាស្ត្រ និង​សៀវភៅ​អប់រំផ្សេងៗ។

ខ្ញុំ​មិនចាំ​ថា​បាន​អាន​​សៀវភៅណាខ្លះ​ទេ​ក្នុង​ឆ្នាំ​នេះ ហើយ​សៀវភៅខ្លះ​ខ្ញុំប្រហែល​អាន​ចប់ពីឆ្នាំ​ទៅផង។ យ៉ាងណា​ខ្ញុំ​នឹង​រៀបរាប់​សៀវភៅ​មួយ​ចំនួន​នៅ​ខាងក្រោម។

កម្រងរឿង ស៊័រឡក់ ហូលម៍ ជាភាសាខ្មែរ

ខ្ញុំធ្លាប់ឮអំពី​កម្រង​រឿង​នេះ​យូរ​មក​ហើយ ជា​ភាសាអង់គ្លេស។ ហើយជាងប្រាំឆ្នាំ​មុន មិនដឹង​មាន​អ្វី​បណ្ដាល​ចិត្ត​ឱ្យ​ខ្ញុំ​ចាប់អារម្មណ៍​មើលរឿង ស៊័រឡក់ ហូលម៍ នៅ​លើ Netflix រហូត​ដល់​ខ្ញុំ​មាន​កូនចិត្ត​ចង់​អាន​រឿង​ដើមរបស់​លោក អាធ័រ ខូណាន់ ដូយលិ៍ ​ជាភាសាខ្មែរ ប៉ុន្តែ​មិនទាន់​មាន​អ្នក​ធ្វើ។

រហូត​ដល់​ឆ្នាំ​ទៅ​មិញ ខ្ញុំ​បាន​ជួប​បងស្រី ហួត សុជាតា (គ្រឹះស្ថានបោះពុម្ពផ្សាយ អវតារ Avatar) គាត់​ក៏​បង្ហើប​អំពី​គម្រោង​បកប្រែកម្រង​រឿង​នោះ​ចំនួន​បីភាគ។ ខ្ញុំ​ក៏​សុំ​ស្ម័គ្រចិត្ត​ជួយអាន!

ក្បួន​ស៊ើបអង្កេត​ដែល​លោក អាធ័រ បានសរសេរ​ឱ្យ​តួអង្គ ស៊័រឡក់ រួមទាំង​សាច់រឿង​ដែល​កើត​មាន​នៅ​ក្នុង​នោះ វា​ប្រទាក់ក្រឡា​គ្នា ដែលសូម្បី​តែ​យើង​ទាយ​ទុក​មុន ក៏​សឹង​ទាយ​មិន​ត្រូវ​ផង!

បច្ចេកទេស​ប្រែសម្រួល​របស់​បង សុជាតា កាន់​តែ​ធ្វើ​ឱ្យ​សាច់រឿង​នោះ​ទាក់ចិត្ត​ថែម​ទៀត ត្បិត​គាត់​ប្រែសម្រួល​តាម​របៀប​ខ្មែរ ពាក្យពេចន៍ ឃ្លោងឃ្លា​ទៀតសោត ងាយអាន។ ធ្វើ​ឱ្យ​ខ្ញុំ​នឹក​ឃើញ​ក្បួន​សរសេរនិង​ប្រែសម្រួល​របស់​លោកតា ជុត ខៃ, អ្នកគ្រូបណ្ឌិត ប៉ែន សេដ្ឋារិន, លោក ប៉ាន សុធី ជាដើម ដែល​កិច្ចការ​នីមួយៗ​របស់​លោក មាន​លក្ខណៈ​ខ្មែរ អាន​ហើយ​មិន​ធុញទ្រាន់។

Sapiens: A Brief History of Humankind

លោក Yuval Noah Harari ជាប្រវត្តិវិទូ ជនជាតិ​អ៊ីស្រាអែល បាន​សរសេរ​សៀវភៅ​នេះ ដោយ​បង្ហាញ​អំពី​ប្រវត្តិសាស្ត្រ​របស់​មនុស្ស ដោយ​ផ្ដល់ទស្សនៈ​ទូលំទូលាយ​ឱ្យ​អ្នកអាន​អាច​ស្វែងយល់​អំពី​ដំណើរប្រព្រឹត្តិ​ទៅ​របស់​មនុស្សជាតិ របបនយោបាយ សេដ្ឋកិច្ច ធាតុអាកាស ជីវសាស្ត្រ សាសនា…

ក្រោយអាន​សៀវភៅ​នេះ​ហើយ ចិត្ត​គំនិត​ខ្ញុំ​បើក​ទូលាយ​ជាងមុន អាច​គិត​ពិចារណា​ពីជ្រុង​ផ្សេងៗ​នៃ​បញ្ហា មុន​នឹង​វាយតម្លៃ​ជារួម​ទៅ​លើ​បញ្ហា​ទាំងនោះ។

ខ្ញុំ​នៅ​ត្រូវអាន​សៀវភៅ​ពីរក្បាល​ទៀត​របស់​គាត់​គឺ Humo Deus និង 21 Lessons for 21th Century។

Atomic Habits

ខ្ញុំ​មិន​គិត​ថា​ខ្លួនខ្ញុំ​ជា​មនុស្ស​ដែល​មាន​ទម្លាប់​ល្អ​ប៉ុន្មាន​ទេ ហើយ​ក៏​ពិបាក​នឹង​រក្សា​ទម្លាប់ឬ​សកម្មភាព​ណាមួយ​ឱ្យ​បាន​ជាប់លាប់​ដែរ។

នៅ​ពេល​ចង់​ធ្វើ​អ្វី​មួយ ខ្ញុំ​តែងតែ​គិត​ថា បើធ្វើ​វាមិន​បាន​ធំ​ទេ ខ្ជិលធ្វើតែម្ដង! ប៉ុន្តែ ក្រោយ​អាន​សៀវភៅ Atomic Habits នេះ​ហើយ ទើប​ខ្ញុំ​ផ្លាស់ប្ដូរ​ការគិត​ទៅ​មួយ​ផ្លូវ​ទៀត។

រឿងជាច្រើន គឺ​កើត​ពី​សកម្មភាព​និង​លទ្ធផល​តូចៗ ដែល​ពូនផ្ដុំ​ទៅ​ជា​រឿងធំ​មួយ​បាន។ នៅ​ក្នុង​សៀវភៅ​នេះ James Clear បាន​យក​គំនិត​នៅ​ក្នុង​សៀវភៅ The Power of Habit (ខ្ញុំមិនទាន់បាន​អាន​ទេ) ហើយ​មកសម្រាយ​តាម​មួយ​បែប​ទៀត ដើម្បី​ឱ្យ​អ្នកអាន​ងាយស្រួល​អនុវត្ត​ក្នុង​កម្រិត​បុគ្គល​ម្នាក់ៗ។

សៀវភៅ​នេះ​បាន​ធ្វើ​ឱ្យ​ខ្ញុំ​ចាប់ផ្ដើម​សរសេរ​បាន​ជាប់លាប់​ជាងមុន អាន​បាន​ច្រើន​ជាង​មុន សូម្បី​តែ​សរសេរ​បាន​មួយបន្ទាត់ ឬអាន​បាន​មួយ​ទំព័រ ក៏​ចាត់ទុក​ថា​ជា​ការ​រីកចម្រើន​ដែរ!

Many people think they lack motivation when what they really lack is clarity. It is not always obvious when and where to take action. Some people spend their entire lives waiting for the time to be right to make an improvement.

…

The best is the enemy of the good.

The Psychology of Money, Morgan Housel

The Psychology of Money

ខ្ញុំ​ធ្លាប់​អាន​សៀវភៅ​ជោគជ័យ សៀវភៅ​គេ​ឱ្យ​ស្រមើស្រមៃ​រឿងលុយ តែ​អាន​អស់​ប៉ុន្មាន​ក្បាល​ទៅ វា​ដូចជា​មិន​សមហេតុផល​សោះ!

យ៉ាងណា ក្រោយអាន​សៀវភៅ The Psychology of Money ​ខ្ញុំ​ចាប់ផ្ដើម​យល់​ច្បាស់​ជាង​មុន​ថា ភាព​មាន​បាន (មានលុយ ឬ អត់លុយ) ការ​ចាយវាយ គឺ​សំខាន់​ត្រង់​ការ​គ្រប់គ្រង​ផ្លូវចិត្ត និង​ការ​យល់​ចំពោះ​វត្តមាន​របស់លុយ​នោះ។

នៅ​ក្នុង​នេះ អ្នកនិពន្ធ​បង្ហាញ​អំពី​ចិត្តសាស្ត្រ​នៅ​ពីក្រោយ​ការ​ចាយវាយ ការវិនិយោគ​ក្នុង​ទីផ្សារ​មូលបត្រ ការសន្សំ​ប្រាក់ និង​មូលហេតុ​ពី​ក្រោយ​ការសម្រេចចិត្ត​របស់​បុគ្គល​ម្នាក់ៗ​លើ​ការ​ចាយវាយ។

Getting Wealthy vs. Staying Wealthy

Good investing is not necessarily about making good decisions. It’s about consistently not screwing up.

The Psychology of Money, Morgan Housel

Start with Why: How Great Leaders Inspire Everyone to Take Action

ខ្ញុំ​ធ្លាប់​ស្ដាប់​បទបង្ហាញ​របស់ ​Simon Sinek និង​កិច្ច​ពិភាក្សា​របស់​គាត់​តាមវីដេអូ​ផ្សេងៗ តែ​មិន​ធ្លាប់អាន​អាន​សៀវភៅ​គាត់​ឡើយ។ ទើប​តែ​ប៉ុន្មានខែ​មុន​ខ្ញុំ​​អាន​សៀវភៅ Start with Why ដែលបាន​ធ្វើ​ឱ្យ​ខ្ញុំ​យល់​ច្បាស់​បន្ថែម​ទៀត អំពី​ភាព​ជាអ្នក​ដឹកនាំ និង​របៀបដឹកនាំ​មនុស្ស​-ស្ថាប័ន តាម​ការ​ដែល​មាន​ទស្សនៈ​វិស័យ និង​ហេតុផល។

ខ្ញុំ​សុំណែនាំ​សៀវភៅ​នេះ​ទៅ​អ្នក​រាល់គ្នា ត្បិត​អី​ខ្លឹមសារ​នៅ​ក្នុង​នេះ បាន​ឆ្លុះបញ្ចាំង​យ៉ាង​ច្បាស់​អំពី​របៀប​ដឹក​នាំ​មនុស្ស​ឱ្យ​ប្រកាន់​ខ្ជាប់​នូវ​ការ​ជឿជាក់​លើ​ខ្លួនឯង និង​ជឿជាក់​លើ​ស្ថាប័ន​ដែល​ខ្លួន​កំពុង​បម្រើការងារ​ឱ្យ។

មិត្តភក្ដិខ្ញុំម្នាក់ជាអ្នកប្រឹក្សាផ្នែកគ្រប់គ្រង ត្រូវក្រុមហ៊ុនខ្នាតប៊ីលានដុល្លារមួយជួលនាងទៅជួយបំពេញគោលដៅនិងមហិច្ឆតារបស់គេ។ នាងពន្យល់ថា បញ្ហាដែលកើតមាន មិនថាបញ្ហាធំតូចប៉ុណ្ណា គឺអ្នកគ្រប់គ្រងក្រុមហ៊ុននោះតែងតែទៅរកដំណោះស្រាយលឿននិងធូរថ្លៃ ជំនួសឱ្យដំណោះស្រាយដែលមានប្រសិទ្ធភាពយូរអង្វែង។ ដូចអ្នកប្ដូររបបអាហារចុះឡើងៗតាមនឹកឃើញដែរ គឺថា «ពួកគេមិនដែលមានពេលនិងលុយដើម្បីធ្វើវាឱ្យត្រឹមត្រូវពីដំបូងទេ ប៉ុន្តែពួកគេតែងតែមានពេលនិងលុយធ្វើវាឡើងវិញដដែលៗ»។

Start with Why, Simon Sinek

សៀវភៅផ្សេង​ទៀត

នៅ​មាន​សៀវភៅ​ដទៃ​ទៀត​ដែល​ខ្ញុំ​បាន​អាន ដូចជា៖

• កម្រងរឿង​ក្រៅភព, គ្រឹះស្ថានអវតារ
• រឿងឆ្មាសុរិយា, គ្រឹះស្ថានអវតារ
• ខ្មោចព្រាយអសុរកាយ, ជុត ខៃ

… ហើយ​ខ្ញុំ​ភ្លេច​អស់​ហើយ​ថា​បាន​អាន​សៀវភៅអ្វីទៀត? ប៉ុណ្ណឹង​ច្រើន​ហើយ​សម្រាប់​ខ្ញុំ ព្រោះ​ឆ្នាំៗទៅ មិនសូវបានអានផងនោះ!

ខ្ញុំសរសេរ

ឆ្នាំ២០២៣ ទុកថា​ជា​ឆ្នាំ​ដែល​ខ្ញុំ​ចាប់ផ្ដើមសរសេរ​ច្រើន​ជាង​មុន។ ប្រសិនបើ​បាន​ស្គាល់​ខ្ញុំ​កាលពីឆ្នាំ២០១០ ប្រហែល​ចាំ​ថា​ខ្ញុំ​ធ្លាប់​សរសេរ​ប្លក់​នៅសហគមន៍ WordPress និង​វ៉ិបសៃត៍ IT4UG.net។ កាលនោះ​ឡូយ​ដែរ សរសេរ​បាន​ជាង៥០០អត្ថបទ​ឯណោះ!

ខ្ញុំ​ផ្អាក​សរសេរ​តាំងពី​ឆ្នាំ២០១៥ រហូត​ដល់​ចុងឆ្នាំ​២០២២ ទើប​ចាប់ផ្ដើម​ចង់​សរសេរ​ឡើង​វិញ ដោយ​សរសេរ​អំពី​ខ្លួនឯងផង រឿង​ការងារ​ជំនាញ​យើង​ផង និង​ទស្សនៈ​ទូទៅ​ក្នុង​សង្គម ដោយ​ប្រកាន់​គោលជំហរ​កណ្ដាល និងវិជ្ជាជីវៈ។

នៅ​ពេល​ខ្ញុំ​បាន​សរសេរ​វិញ ហាក់ដូចជា​ខ្ញុំ​យកខ្លួនឯង​ពី​ក្នុង​អណ្ដូង​ដ៏​ជ្រៅ​មួយ មក​ខាងលើ​វិញ​ម្ដង​បន្តិចៗ។

ការ​សរសេរ មិន​ត្រឹមតែ​ជួយឱ្យ​ខ្ញុំ​អាច​បញ្ចេញ​ទស្សនៈ​បាន​ច្រើន​ជាង​មុន​នោះ​ទេ តែ​ក៏​ឱ្យ​អ្នកអាន​ចូលរួម​ជាមួយ​ខ្ញុំ​ដើម្បីជជែក​និង​ស្វែងយល់​លើ​ប្រធានបទ​ណាមួយ​បាន​កាន់តែល្អនិង​ស៊ីជំម្រៅ។

សំណេរ​ទាំងឡាយនឹង​ស្ថិត​នៅ​ក្នុង​បណ្ដាញ​អ៊ីនធឺណិត​ដ៏ធំ ដែល​អ្នក​អាន​ផ្សេងៗ​អាចរកឃើញ អាច​អាន​បាន គ្រប់​ពេលវេលា និង​ងាយស្រួល​រក​មើល​ចំណុច​ដែលខ្លួន​ចង់​ដឹង។

បច្ចុប្បន្ន​ខ្ញុំ​មិន​សូវ​សរសេរ​ច្រើន​លើ​បណ្ដាញសង្គម​ដូច​មុន​ទៀតទេ។ ប្រសិនបើ​ចង់​និយាយ​អំពី​ប្រធានបទ​ណាមួយ ខ្ញុំ​យក​មក​សរសេរ​លើ​ប្លក់​វិញ ទុក​បាន​យូរ ងាយ​ស្រួល​បង្ហាញ​សេចក្ដី​អស់ជាង។ សម្រាប់​ខ្ញុំ ការសរសេរ​ជួយ​ឱ្យ​ខ្ញុំ​និយាយ​បាន​ល្អ​ជាង​មុន​។

ខ្ញុំ​សរសេរ​នៅទីនេះ sovichet.com និង​នៅ khmertypography.com។

ខ្ញុំនិយាយ

ខ្ញុំ​ខាន​ទៅ​បង្រៀន​ឌីហ្សាញ​ពុម្ពអក្សរខ្មែរ​ និង​ធ្វើបទបង្ហាញ អស់ពេលជិតបី​ឆ្នាំហើយ!

ឆ្នាំ​នេះ ខ្ញុំ​មាន​ឱកាស​ទៅ​ចូលរួម​កម្មវិធី BITS10 នៅ​បាងកក ដោយ​និយាយ​លើ​ប្រធានបទ​ពីរ​ផ្សេង​គ្នា និង​បាន​ជួប​ជាមួយ​មិត្តភក្ដិ​ចាស់ថ្មី ចែករំលែក​បទគំនិត​និង​ទស្សនៈ​ជុំវិញ​ជំនាញ​សព្វថ្ងៃ។

ក្រៅពីនេះ ខ្ញុំ​ព្យាយាម​ជួប​អ្នក​នៅ​ក្នុង​វិស័យ​នានា និង​រៀបចំ​វគ្គបង្រៀន​ម្ដង​ម្កាល​នៅ​ក្នុង​ស្រុក ដើម្បី​ចែករំលែក​វិជ្ជាគុន​ដែល​ខ្ញុំ​មាន។

ការងារខ្ញុំសព្វថ្ងៃ​ខាង​ឌីហ្សាញ​ពុម្ពអក្សរ ក្រៅ​តែ​អំពី​ការ​ធ្វើ​អក្សរ​មើល​ទៅ​មាន​ក្បូរក្បាច់​ស្អាត​ម្យ៉ាង ក៏​ត្រូវការ​ពុម្ពអក្សរ​ដែល​អាច​ប្រើ​ត្រូវ​តម្រូវការ និង​ដោះស្រាយ​បញ្ហា​នានា​ដែល​អតិថិជន​ត្រូវការ។ ការ​ធ្វើ​បែប​នេះ ទាមទារ​ការ​សិក្សា​ស្រាវជ្រាវ ការ​បង្រៀន​ទៅអតិថិជន និង​ការ​ស្វែងរក​ដំណោះស្រាយ​ដ៏​សមស្រប​ដើម្បី​សម្រេច​កិច្ចការ​ទាំង​នោះ។

អ៊ីចឹង​ហើយ តាមតែអាច​ធ្វើ​ទៅរួច ខ្ញុំ​បាន​ជជែកអំពី​ប្រធានបទ​នេះ​បាន​ខ្លះ​ដែរ​នា​ពេលកន្លង​មក ហើយ​សង្ឃឹម​ថា​អាច​ធ្វើ​បន្ថែម​ទៀត​ទៅ​អនាគត។

ខ្ញុំ​ចប់​សេចក្ដី​ត្រឹម​ប៉ុណ្ណេះ! នេះ​គ្រាន់តែ​ជា​អត្ថបទ​ផ្ទាល់ខ្លួន ចាត់​ទុក​ថា​ខ្ញុំ​សរសេរ​រំឭក​ខ្លួនឯង និង​ចែករំលែក​ដំណើរ​ជីវិត​ខ្លះៗ​ដល់​មិត្ត​អ្នកអាន​រាល់គ្នា។

រីករាយឆ្នាំ​សាកល ២០២៤!