គុណតម្លៃការងារ

នៅពេលខ្ញុំចាប់ផ្ដើមឈានជើងចូលក្នុងពិភពការងារ និងការរកស៊ីដំបូងៗ ខ្ញុំធ្លាប់គិតថាថា “ការងារទទួលមួយជោគជ័យ” នៅពេលខ្ញុំធ្វើឱ្យរួចទាន់ពេល ទទួលបានកម្រៃល្អ និងមានអ្នកពោលសរសើរគាំទ្រ។ ប៉ុន្តែក្រោយពីបានឆ្លងកាត់ការអនុវត្តផ្ទាល់ ខ្ញុំក៏ដឹងថា ការគិតត្រឹមប៉ុណ្ណឹង គឺនៅខ្វះធាតុផ្សំជាច្រើនទៀតដែលរួមបង្កើតបានជា “ការងារដែលមានតម្លៃ”។

នៅពេលអ្នកបណ្ដោយឱ្យចិត្តរំពឹងលើការគាំទ្រពីមជ្ឈដ្ឋានខាងក្រៅខ្លាំងពេក អ្នកអាចនឹងឈានទៅរកការ “បង្ខំធ្វើដើម្បីតម្រូវចិត្តគេ” រហូត​ដល់​ថ្នាក់​ថា បើ​អត់​មានអ្នក​គាំទ្រ អ្នក​មិន​អាចបន្ត​ធ្វើកិច្ចការ​នោះ​បានទៀតឡើយ។

១. ភាពខុសគ្នារវាង «តម្លៃ» និង «គុណតម្លៃ»

ពាក្យថា «តម្លៃ» (Price) និង «គុណតម្លៃ» (Value) ច្រើនតែត្រូវបានគេប្រើប្រាស់ច្រឡំគ្នា ឬហៅកាត់ៗ។ ការណ៍នេះនាំឱ្យយើងផ្ដោតខ្លាំងតែលើ “ថ្លៃថ្នូរ” ជាប្រាក់កាស ឬតួលេខ។

សម្រាប់ខ្ញុំ ការងារមិនមែនសំដៅតែលើការរកស៊ី ឬការងារក្រុមហ៊ុនឡើយ។ គ្រប់កិច្ចការក្នុងគ្រប់វិស័យ សុទ្ធតែមានគុណតម្លៃរៀងៗខ្លួន អាស្រ័យទៅតាមស្ថានភាពសង្គម។ ការងារខ្លះដែលមានមនុស្សរោមគាំទ្រ ឬលើកតម្កើងផុសផុល មិនប្រាកដថាជានិរន្តរភាពនោះទេ ប្រសិនបើវាមិនមាន “មូលហេតុ” រឹងមាំដែលធ្វើឱ្យមនុស្សចង់រក្សាការគាំទ្រនោះយូរអង្វែង។ ផ្ទុយទៅវិញ ការងារខ្លះដែលហាក់ស្ងប់ស្ងាត់ មិនសូវលឺគេនិយាយ ក៏មិនអាចសន្មតិថាគ្មានតម្លៃនោះដែរ!

២. កុំឱ្យ «សំឡេងខាងក្រៅ» ក្លាយជាកត្តាបង្ខំខ្លួនឯង

កំហុសឆ្គងមួយដែលយើងតែងជួបប្រទះ គឺការយក “ចំណាប់អារម្មណ៍ពីមជ្ឈដ្ឋានខាងក្រៅ” មកធ្វើជាខ្នាតវាស់ស្ទង់ភាពជោគជ័យ។ នៅពេលអ្នកបណ្ដោយឱ្យចិត្តរំពឹងលើការគាំទ្រពីមជ្ឈដ្ឋានខាងក្រៅខ្លាំងពេក អ្នកអាចនឹងឈានទៅរកការ “បង្ខំធ្វើដើម្បីតម្រូវចិត្តគេ” រហូត​ដល់​ថ្នាក់​ថា បើ​អត់​មានអ្នក​គាំទ្រ អ្នក​មិន​អាចបន្ត​ធ្វើកិច្ចការ​នោះ​បានទៀតឡើយ។

ការធ្វើបែបនេះ មិនអាចផ្តល់នូវភាពស្ថិតស្ថេរបានទេ ព្រោះថាអ្វីៗនឹងប្រែជាខកបំណងខ្លាំង នៅពេលមិនទទួលបានលទ្ធផល ដូចការរំពឹងទុក។ ទោះជាអាជីវកម្មត្រូវការការគាំទ្រដើម្បីប្រាក់ចំណូល ប៉ុន្តែយើងមិនអាចផ្លាស់ប្តូរគ្រប់យ៉ាងតម្រូវចិត្តអ្នកដទៃរហូតបាត់បង់អត្តសញ្ញាណខ្លួនឯងនោះទេ។ នេះហើយជាមូលហេតុដែលយើងត្រូវមាន ទស្សនវិស័យ (Vision), បេសកកម្ម (Mission), និង គោលដៅ (Goal) ដែលច្បាស់លាស់។ ធាតុទាំងបីនេះហើយ ជាអ្នកទាក់ទាញមនុស្សដែល “ត្រូវគ្នា” ឱ្យមកគាំទ្រយើងដោយឯកឯង។

៣. ធម្មជាតិនៃការចាប់អារម្មណ៍ និងការធ្លាក់ចុះ

ជាធម្មជាតិរបស់មនុស្ស អ្វីដែល “ថ្មី” តែងតែទាក់ទាញភ្នែកនិងអារម្មណ៍ចង់ដឹងមួយគ្រា។ នៅពេលយើងចេញផ្សាយអ្វីមួយដំបូង តួលេខនៃអ្នកចាប់អារម្មណ៍អាចនឹងហក់ឡើងខ្ពស់ ប៉ុន្តែវានឹងថយចុះម្ដងបន្តិចៗទៅតាមពេលវេលា។ ការថយចុះនេះអាចបកស្រាយបានពីរយ៉ាង៖

• ទីមួយ៖ យើងមិនបានបន្ថែមអ្វីដែលថ្មីជាបន្តបន្ទាប់ រហូតទៅជាបាត់បង់អ្នកគាំទ្រ។
• ទីពីរ៖ វាជាដំណើរការការចម្រាញ់ ដើម្បីស្វែងរក “ក្រុមអ្នកគាំទ្រពិតប្រាកដ” (Core Audience) ដែលផ្តល់តម្លៃដល់កិច្ចការរបស់យើងពិតមែន។

៤. គុណភាពលើសពីបរិមាណ

អ្នកបង្កើតស្នាដៃ មិនគួរដាក់សម្ពាធលើខ្លួនឯងខ្លាំងពេកទៅលើ “ចំនួន” អ្នកចូលមកគាំទ្រ អ្នក Like & Share ឬ ចំនួនអ្នកសរសើរឡើយ។ ត្រូវយល់ថា ការដែលមនុស្សម្នាក់សម្រេចចិត្តគាំទ្រយើង គឺគេត្រូវចំណាយទាំងពេលវេលា ថវិកា និងកម្លាំងកាយចិត្ត។ ហើយអ្នកដែលគាំទ្រយើង គឺដោយសារតែយើងមានអ្វីម្យ៉ាងដែលត្រូវគ្នានឹងគុណតម្លៃរបស់គេដែរ។

ប្រសិនបើយើងនៅបន្តរក្សា “ស្នូលនៃគុណតម្លៃ” និងភាពជឿជាក់នៃកិច្ចការនោះ ឱ្យគេមើលឃើញពីសារប្រយោជន៍ចំពោះគេ និងសង្គម នោះការគាំទ្រនឹងនៅតែបន្តមាន ទោះក្នុងទំហំណាក៏ដោយ។

ហេតុដូច្នេះហើយ ការរក្សានិរន្តរភាពនៃគុណតម្លៃ នឹងជួយឱ្យយើងស្គាល់ថា ការងាររបស់យើងត្រូវជាមួយនឹងមនុស្សប្រភេទណា ហើយវាអាចជះឥទ្ធិពលវិជ្ជមានដល់សង្គមបានកម្រិតណា។ មិនមែនគ្រប់គ្នាជុំវិញខ្លួនត្រូវតែគាំទ្រយើងទេ ប៉ុន្តែការធ្វើកិច្ចការដោយមានមនសិការ និងគុណតម្លៃពិតប្រាកដ នឹងបន្សល់ទុកនូវផ្លែផ្កាដែលស្ថិតស្ថេរយូរអង្វែង។

រូបថត៖ ក្មេងស្រីចែវទូក នៅសហគមន៍ទេសចរណ៍ មេជ្រៃ ខេត្តសៀមរាប ឆ្នាំ 2025